SØK

Go Back

SDS 2016 JAHKEČOAHKKIN -JAHKEČOAHKKINCEALKÁMUŠ

AAGE GAUP SDS GUDNEMIELLAHTTUN

 

Govvačuolli Aage Gaup nammaduvvo 2016 jahkečoahkkimis Sámi

Dáiddačehpiid Searvvi/SDS gudnemiellahtun.

Aage Gaup lei fárus sámi dáiddáriid vuosttas čoagganeamis 1970-logu

gaskamuttos čiŋahemiin Láhpoluobbala skuvlla Guovdageainnu gielddas.

Maŋŋil son lei fárus álggaheamen Sámi Dáiddárjoavkku Mázes geat ohce

lanjaid oktasašbájiide dáiddalaš doaimmaide. Aage Gaup lei daid vuosttažiid

gaskkas dan joavkkus geat fárrejedje Mázii ja álggahedje dan stuorra barggu

ásahit oktasašbájiid. Dáiddajoavkkus lei Aage okta daid vuosttažiin guhte

evttohii sierra sámi dáiddárguovddáža. Son lei árat 1970-logus

studeantaáiggistis Troanddimis leamaš fárus ceggemin Trøndelag

kunstnersentera ja oinnii dárbbu dákkár ásahussii maiddái sámi oktavuođas.

Aage lea SDS:s fargga 40 jagi historjjás leamaš lagaš ja luohtehahtti

miellahttu, nana fágaduogážiin dáiddafidnu birra. Son lea gergen máŋggaid

almmolaš čiŋahanbargguid stuorra hámis ja su barggut scenográfan Beaivváš

Sámi Nášunalteáhterin leat máŋga ja oahppásat olugiidda.

Mázejoavkkus dat álggahuvvui, Aage máhtu ja geavatlaš čađahančehppodaga

haga ii livččii prošeakta leamaš vejolaš. Mázejoavku ásahii SDS:i dárbbu ja

oktan eará dehálaš doaimmaheaddjiiguin Sámis vuođđuduvvui searvi 1979:s.

Aage Gaup lea dán historjjás guovddáš olmmožin, su árjja lea leamaš

iešráhkisvuođa haga ja višuneara ja berre bálkáhuvvot gudnemiellahttovuođain.